Sajak

Kanggo Jungjunan

Jungjunan

Salira ukur kalangkang

Moal bisa dirampa

Tapi haté terus ngarasa anjeun aya

Ngamalir asih ngancik na ati

Ngahiji lir getih dina diri

Jungjunan

Jung geura lumaku

Najan haté wilut

Moal rék milu

Bral geura lumampah

Najan teu wasa nandangan

Moal rék diudag

Cag

Garut, 9 Maret 2014

Sajak

Duka Ah

Duka naonna

sagalana gé biasa

naha haté bet tibelat

Duka iraha

aya rasa nyulusup

naha haté bet kapincut

Duka kumaha

basa aya nu unggah

naha haté bet guligah

Kaéndahan nu teu meunang nyangsang

dijauhan disingkahan

tapi manéhna teu weléh ngalangkang

Ngolébat matak kabéngbat

Garut, 27 Maret 2014